Մայրիկի օգնականները. ինչպե՞ս ընտրել լոգանքի պարագաներ

Ծնողները շատ են անհանգստանում, երբ գալիս է առաջին անգամ նորածնին լողացնելու պահը: Որպեսզի փոքրիկը հանգստանա և դրական էմոցիաներ ստանա ջրի հետ շփումից, հարկ է նախապատրաստել ոչ միայն մանկական լոգարանը, այլ նաև՝ մյուս անհրաժեշտ պարագաները: Նախկինում երեխայի լոգանքին աջակցում էին հայրիկը կամ տատիկը: Ըստ ավանդության՝ նորածնի լոգանքն իրականացվում էր երկու անձանց մասակցությամբ: Այսօր այդ գործընթացի հեշտացմանը նպաստում են հատուկ հարմարանքներ՝ պատրաստված կտորից կամ պլաստմասից: Եկեք ծանոթանանք դրանցից ամենատարածվածների հետ:

 Լոգանքի ցանց
Այն պատրաստված է ամուր, փափուկ կտորից կամ ցանցից, չի հարում և չի վնասում երեխայի նուրբ մաշկը: Այն տեղադրվում է մանկական լոգարանի վրա՝ և ամրանում հատուկ կեռիկների օգնությամբ:
Օգտագործման դրական կողմերը՝
հեշտությամբ լվացվում է և չորանում գրեթե ակնթարթորեն, զբաղեցնում է մինիմալ տարածք, մատչելի է, ծնողներին հնարավորություն է տալիս խուսափել մեջքի և ձեռքերի լարվածությունից, ապահովում է հաճելի լոգանք ինչպես փոքրիկին, այնպես էլ ծնողներին: 
Շատ մայրիկներ են ընդգծում երեխայի լոգանքի համար օգտագործվող ցանցերի հարամարավետությունը, քանի որ, այն իր կազմության մեջ պարունակում է պոլիպրոպիլենից պատրաստված փափուկ գնդիկներ: Սա թույլ է տալիս մայրիկին վստահ լինել երեխայի հարմարավետության և անվտանգության հարցում:
Լոգանքի ցանցի օգտագործումից հետո անհրաժեշտ է այն լվանալ հոսող ջրի տակ, թափահարել և կախել, որպեսզի չորանա: Պարբերաբար անհրաժեշտ է լվանալ ձեռքով՝ մանկական լվացող միջոցներով:

Կարելի է օգտագործել 0+ տարիքի երեխաների համար:

Լոգանքի օղակ

Երեխաների լոգանքի համար նախատեսված վզի օղակները նախատեսված են 0-2 տարեկան երեխաների համար: Կիրառվում են տնային կամ բացօթյա պայմաններում՝ ոչ ավելի, քան ջրի 1 մետր խորության դեպքում: Լոգանքի օղակը հեշտացնում է ծնողների աշխատանքը՝ փոքրիկի լոգանքի գործընթացում՝ դարձնելով վերջինս առավել հաճելի և ապահով: Երեխայի վզին ամրացված օղակը ամենևին անհարմարություն չի պատճառում փոքրիկին:  Հրաշալիորեն նպաստում է մկանային համակարգի զարգացմանն ու կատարելապես խթանում է լողանալու բնական ռեֆլեքսը, ինպես նաև օգնում երեխային ազատ լողալ ջրում առանց ծնողների օգնության:
Որակյալ լոգանքի օղակները ունենում են հարթ ներքին կարեր, և փափուկ եզր՝ նորածինների նուրբ մաշկը չվնասելու համար:  

Կարելի է օգտագործել 0+ տարիքի երեխաների համար:

Լոգանքի մատրաս

Մատրասը փափուկ, հարմարավետ և, կարելի է ասել, ունիվերսալ պարագա է՝ նախատեսված նորածինների և ավելի մեծ տարիքի մանուկների համար: Այն կարելի է տեղադրել ինչպես մանկական լոգարանի, այնպես էլ մեծահասակների լողարանում:  Այս տարբերակը դյուրին է օգտագործման մեջ, քանի որ չկան պինդ տարրեր, ամրակներ, ինչի շնորհիվ հեշտ տեղադրվում և հարմարեցվում է երեխայի հենման դիրքին: Երեխան պարզապես պառկում է ջրում՝ լոգանքի մատրասի վրա: Սակայն մատրասն ունի նաև մի շարք առանձնահատկություններ: Քանի որ մատրասը պատրաստված է սպունգից, այն բավականին դժվար է չորացվում, պահանջում է տևական ժամանակ և անհարմար է կախելու համար: Այն պարբերաբար անհրաժեշտ է լվանալ մանկական լվացող միջոցներով:

Կարելի է օգտագործել 0+ տարիքի երեխաների համար:

Լոգանքի աթոռ

Լոգանքի աթոռները ունեն ռետինե վակուումային ամրակներ, որի շնորհիվ ամրացվում են լոգարանի հատակին: Աթոռի բարձր եզրերի շնորհիվ, երեխան չի կարող սահել և ընկնել ջուրը: Ապահով է նաև չափազանց ակտիվ և շարժուն երեխաների պարագայում, հատկապես, երբ աթոռը տեղադրվում է մեծահասակների լոգարանում:  Օգտագործվում են 6-7 ամսական և ավել երեխաների համար (յուրաքանչյուր արտադրող սահմանում է հստակ ժամկետն անհատապես),  այսինքն այն ժամանակ, երբ երեխան արդեն կարողանում է ինքնուրույն նստել:

Լոգանքի աթոռակ 

Պլաստամասե աթոռակը կարելի է օգտագործել շարժական տարբերակով, որպեսզի հնարավոր լինի հիմնական լոգանքից հետո այն հեռացնել, ու լոգանքը շարունակել ջրում ազատ լող տալով: Ցանկալի է աթոռակի վրա սրբիչ տեղադրել, երեխային առավել հարմարավետ և փափուկ նստատեղ ապահովելու համար:
Սակայն պետք է հաշվի առնել, որ այս  հարմարանքը նախատեսված չէ նորածինների համար, քանի որ դրա կառուցվածքը ենթադրում է, որ երեխային պետք է նստեցնել, իսկ ինչպես հայտնի է երեխաներին մինչև 6 ամսական լրանալը նստեցնել չի թույլատրվում: 
Օգտագործման դրական կողմերն են՝ աթոռակը հարմար է օգտագործել նաև մեծ լողարաններում: Ունի հարմար ձև, պահպանում է ոտքերի և ձեռքերի հարմար դիրք: Ռետինե ամրակները ապահով կցվում են լողարանի հատակին:

Աթոռակը հարմար է ինչպես 6-7 ամսական երեխաների, այնպես էլ ավելի մեծ տարիքի մանուկների համար:

Լոգանքի աթոռակ՝ ներկառուցված մանկական լոգարանի ներսում

Այսպիսի աթոռակները թույլ են տալիս հարմարավետորեն նստեցնել երեխային և օգնում են մայրիկին՝ երեխայի լողացման ընթացքում: Նստած դիրքի պատճառով այս աթոռակը ևս հարմար չէ նորածինների համար: Ներկառուցված աթոռակով մանկական լոգարանը հարմար է օգտագործել 6-7 ամսական երեխաների պարագայում, այսինքն՝ այն ժամանակ, երբ երեխան արդեն կարողանում է ինքնուրույն նստել: